ՔԵԶՆԻՑ ՀԵՏՈ

Ծովի, երկնքի և լեռների մեջ
Ես մենա՜կ, մենա՜կ, մենա՜կ մնացի…

Տարերքի շաչուն լույսերի միջով
Հողմերը ոսկե ավազներ տարան,
Լցված հեռավոր ափերի տենչով՝
Լեռները ճամփորդ նժույգներ դառան,
Եվ չնվաճած բարձրության կանչով
Հավքերը ձյունոտ գագաթներ թռան։

Փուլ եկավ հեռվում ոսկեղեն մի ամպ —
Կաթիլներ ընկան փափուկ շառաչով,
Եվ խոտերն ինչ-որ անուշ տխրությամբ
Ինձ տանում էին անձրևի միջով։ Continue reading “ՔԵԶՆԻՑ ՀԵՏՈ”

Advertisements

ԵՐԳ ԱՆՁՆԱԿԱՆ

Իմ մահվան օրը կիջնի տխրություն…
ՉԱՐԵՆՑ

Խնջույք կլինի կամ ինչ-որ հանդես,
Կամ սովորական մի հավաքույթում
Անունս կտան, և դու կլսես
Ծովի հեռավոր ալեբախություն։

Այդ գիշեր երկար քունդ չի տանի,
Կհիշես դեպքեր — մոռացված արդեն,
Խուլ դարակներից հին պահարանի
Կհանես դեղնած հանդեսներ, թերթեր,

Եվ իմ երգերը կկարդաս նորից,
Եվ կշշնջաս մորմոքով անսուտ.
— Այս ջահել ու խենթ բանաստեղծներին
Ինչո՞ւ է այսքան մեռնելը սազում…

Անցլալ թախիծը կպաշարի քեզ՝
Առնչելով իմ մոռացվող հուշին,
Եվ լաց կլինես, և լուռ կմաքրես
Վաղուց չբացված գրքերիս փոշին։

Հետո կթրջի անձրևն ապակին
Եվ, ուշքի գալով ամպրոպի ձայնից,
Թերթեր, հանդեսներ — կամփոփես կրկին
Խուլ դարակներում հին պահարանի,

Մինչև որ կրկին լինի մի հանդես
Կամ սովորական մի հավաքույթում
Իմ անունը տան, և նորից լսես
Ծովի հեռավոր ալեբախություն։

© Իգնատ Մամյան
«Վայրի մեղր», 1999

 

ՔԵԶՆԻՑ ՀԵՏՈ

Ներսը թախի՜ծ,
Դուրսը թախի՜ծ,
Հատակը պաղ, պատերը թաց,
Սարդը կախվել առաստաղից
Կամաց-կամաց իջնում է ցած։

Ներսը մշո՜ւշ,
Դուրսը մշո՜ւշ,
Ի՜նչ աղոտ է փայլն ապակու…
Կատվի ձագը՝ կորած մի հուշ,
Մլավում է ձեղնահարկում։
Սերը գնա՜ց,
Սերը չկա,
Եվ հողմահար, և մարմրուն
Նրա ձայնը հնչում է դեռ
Մոռացության քարայրներում։ Continue reading “ՔԵԶՆԻՑ ՀԵՏՈ”

ՄԻԱՅՆԱԿ ԾԵՐՈԻՆՈԻ ՄԱՀԸ

miaynakceruni

Նրան դուրս բերին անշուք դագաղով
Արվարձանային ինչ-որ նկուղից:
Ծանոթ-բարեկամ՝ մի քանի հոգով:
Ոչ նվագախումբ, ոչ սգո թախիծ:

Ինքն էր խաչել իր ձեռքերը կրծքին
Եվ մահից առաջ աչքերը գոցել:
Տանտերն ասում էր. ողորմի հոգուն,
Խեղճը հինգ ամսվա վարձը չէր մուծել… Continue reading “ՄԻԱՅՆԱԿ ԾԵՐՈԻՆՈԻ ՄԱՀԸ”

Բ Ա Ռ Ը (Տեսանյութ)

eveningՆա ինձ երևաց կաղնու ստվերում՝
Անձրևի կապույտ շղարշը հագին,
Մի ձեռքով լույս էր խոտերին ցանում,
Մյուսով շոյում եղնիկի ձագին։

Մոտ արի, ասաց, մի վախեցիր, գառ,
Երբվանի՜ց այստեղ քեզ եմ սպասում…
Եվ արցունքներս սրբեց քնքշաբար,
Եվ տարածելով ձեռքը մշուշում՝
Ինձ տվեց մի բուռ կայծկլտուն ասուպ։ Continue reading “Բ Ա Ռ Ը (Տեսանյութ)”

Ա Ն Ա Ռ Ա Կ Ը

8432701639Հայացքս շաղված, մարմինս հիվանդ
Եվ աչքերիս տակ — կապտավուն բծեր,
Աղոտ մի հույսով, թե վերջին պահին
Ճակատագիրն ինձ տեր լինի գուցե,

Ես փախչում էի մութ փողոցներով՝
Մահվան ոռնացող սարսափն իմ հոգում,
Ու իմ ետևից վառվող ջահերով
Հորձանք էր տալիս ամբոխն ահարկու։

— Լի՛րբ,- մռնչում էր ու նետում քարեր,-
Մեղանչած մարմին, մեղքերի խորան,
Քո պատճառով են երաշտ ու մորեխ
Չոքել մեր ծաղկած դաշտերի վրա… Continue reading “Ա Ն Ա Ռ Ա Կ Ը”

ԵՂԵՐԵՐԳ ՍԻՐՈ ԾՆՆԴՈՎ

ignatmamyanԹխպոտ երկինք, դատարկ հովիտ, վայրի ծով.—
Ես չկայի, դու չկայիր, նա չկար.
Անձրևահար բլուրների վրայով
Անցնում էին թռչունները խուռներամ։

Գնում էին դեպի ծառերը հեռու՝
Օդը լցրած աղեկտուր կանչերով,
Ու չէր փոխվում ոչի՜նչ, ոչինչ աշխարհում՝
Սառն արևի վառվելով ու հանգչելով։

Երկրի վրա սողում էին գորշ ամպեր,
Ճչում էին մրրիկները խելագար,
Բայց ո՞վ պիտի այս ամենից սարսափեր.
Ես չկայի, դու չկայիր, նա չկար։ Continue reading “ԵՂԵՐԵՐԳ ՍԻՐՈ ԾՆՆԴՈՎ”

ՀԱՄՈ ՍԱՀՅԱՆ

hamosahyan1.

Հորանջում էին կածանները թաց,
Եվ ի՞նչ էր տեսել ժայռը երազում…
Քարափի գլխին իրար խառնված
Կայծկլտում էին աստղեր ու մասուր։

Քարայրների մեջ խշշում էր քամին,
Լույսի բուրմունք էր, շքեղ առավոտ,
Մեկը կանգնել էր անձավի շեմին՝
Աչքերը` խոնավ, ձեռքերը՝ կավոտ։ Continue reading “ՀԱՄՈ ՍԱՀՅԱՆ”